عليل ابلوعتك وشكبره هم البيك -- لوفاة السجاد ع

[عدنان الحمامي]

بسمه تعالى
------

------------- طريقه منبريه

------ المستهل

عالهزل مچتوف -- لايصح ناصر

بعيونك اتشوف -- دم المناحر

اشلون الك روح اتحملت ذبح الميامين

وانته عليل وشاهدت مذبوح ا لحسين

لايصح ناصر -- لايصح نلصر

--------------------

عليل ابلوعتك وشكبره هم البيك

يامظيوم ياظيم الذي ايبچيك

دمع العين عگب الفاجعه ايسليك

ياصوره البعد تنساها شينسيك

شمخزن اجروح -- گلبك يمظلوم

چم نحر مذبوح -- ينزف الهليوم

لوصدر ابوك الماسلم من عنده ضلعين

ونته عليل وشاهدت مذبوح الحسين

لايصح ناصر -- لايصح ناصر

-------------------

صدر حسين ابوك الماسلم ضلعه

وياجسم المگطع بيدك اتجمعه

عفاك اشچم اخو ابطف كربله اتودعه

وعن دربك طفوهن گلي چم شمعه

بجروح الايام -- عمرك گضيته

ابعلتك وآلام -- دم البچيته

الله اليعينك مو دمع دم هلت العين

ونته عليل وشاهدت مذبوح الحسين

لايصح ناصر -- لايصح ناصر

----------------------

عليك اصعب واشد من حرگوا اخيامك

وعمتك تنضرب بالسوط جدامك

مچتوف ابحبل وتكابد آلامك

ظلت هالمآسي اوياك باحلامك

حزنك مينقاس -- شتحمله ياروح

من شفت عباس -- عالشاطي مطروح

والجود يمه ورايته وبليه چفين

ونته عليل وشاهد مذبوح الحسين

لايصح ناصر -- لايصح ناصر

------------------------

اگطعت درب اليسر ومشيت للكوفه

وأعليك العدو شاهرها لسيوفه

وتشوف اليتامه شلون مچتوفه

وراس حسين ويه اضعونك تشوفه

عينك تصد ليه -- هاي شمصيبه

وزينب تحاچيه -- اتگله غريبه

يبن امي چتالك حده ماندري لاوين

ونته عليل وشاهدت مذبوح الحسين

لايصح ناصر -- لايصح ناصر

----------------------

وانته اعله الهزل والروس تبرالك

والعباس راسه اتشاهده اگبالك

يعمي اتگله گوم وشوف چتالك

هوه اللي حده بزينب وبعيالك

لاسيف يحميك -- لارايه وياك

والعدو ايباريك -- للكوفه ممشاك

الزينب تگلها امن الهظم عمه لتبچين

ونته عليل وشاهدت مذبوح الحسين

لايصح ناصر -- لايصح ناصر

---------------------

بيدك كل بني هاشم دفنهم صار

عمامك واخوتك وياهم الانصار

ونته بالمرض والنايبه محتار

جابهت الظلم والجور والاخطار

يالفاگد اهلك -- دمعك يعاتب

تبچي اعله حالك -- اعيون النوايب

عشت ابمراره وبالالم خلصَت اللسنين

ونته عليل وشاهدت مذبوح الحسين

لايصح ناصر -- لايصح ناصر

-----------------------

رغم كل المراره والظلم والجور

وكل اهلك ذبايح صاروا ابعاشور

غدرت بيك اهل الباطل اهل الزور

سم ايجرعوك وغيبوا يانور

تالي يغدروك -- اهل الظلاله

بالسم يغيبوك -- گوم الجهاله

مو چبد بالسم گطعوا للنبي چبدين

ونته عليل وشاهدت مذبوح الحسين

لايصح ناصر -- لايصح ناصر

-------------------



سيد عدنان الحمامي

[نجمةالأحساء]

اَلسَّلامُ عَلَيْكَ يا سَيِّدَ الْعابِدينَ وَسُلالَةَ الْوَصِيّينَ اَلسَّلامُ عَلَيْكَ يا باقِرَ عِلْمِ النَّبِيّينَ اَلسَّلامُ عَلَيْكَ يا صادِقاً مُصَدِّقاً فِي الْقَوْلِ وَالْفِعْلِ

عظم الله اجونا واجوركم ..
يعطيك العافييه اخي على القصيده الرائعه
وفقكم الله دائما..

[عدنان الحمامي]

بسمه تعالى

نجمة الاحساء سلام عليكم

احسن الله عملك ووفقك الى مرضاته

وجعل لك ولنا حسن العاقبه

اشكر مرورك الكريم